Kjo ekspozitë e organizuar nga Qendra për Studime Shqiptare nga Londra, MPJ e Kosovës dhe MPJ e Shqipërisë përmban piktura, dokumente, harta, fotografi, shkrime dhe karikatura nga arkivat britanike, një pjesë e të cilave janë prezantuar për herë të parë para publikut

Me rastin e 5-vjetorit të pavarësisë së Kosovës si dhe në kuadër të shënimit të 100-vjetorit të pavarësisë së Shqipërisë, të enjten në Prishtinë është hapur ekspozita unike, “Si i shihte Londra Ballkanin, Kosovën dhe Shqipërinë 100 vjet më parë?”. 

Kjo ekspozitë e organizuar nga Qendra për Studime Shqiptare nga Londra, MPJ e Kosovës dhe MPJ e Shqipërisë përmban piktura, dokumente, harta, fotografi, shkrime dhe karikatura nga arkivat britanike, një pjesë e të cilave janë prezantuar për herë të parë para publikut. 

Ministri i Punëve të Jashtme i Kosovës, Enver Hoxhaj, në hapje të ekspozitës ka thënë se në rrafshin kohor ajo ofron pamje, imazhe dhe përmbajtje që nga shekulli 17, 18, 19 dhe veçanërisht shekulli 20, duke përshkruar fatin dhe pozitën e shqiptarëve në Ballkan, por mbi të gjitha duke pasur në fokus themelimin e shtetit shqiptar, formimin e shtetit shqiptar, luftërat ballkanike. 

“Kjo ekspozitë tregon se ku kemi qenë ne para 100 vjetësh, para 200 vjetësh, para 300 vjetësh, se sa rrugë të gjatë kemi bërë që sot në shkurtin e vitit 2013 të kemi shtetin e Kosovës si shtet sovran dhe të pavarur, shumetnik dhe si shtet qytetar, i cili reflekton aspiratat që ka pasur populli i Kosovës, populli i Shqipërisë gjatë këtyre shekujve”, tha Hoxhaj, duke shtuar se në këtë rrugë të gjatë shqiptarët kanë pasur vazhdimisht një shtet mik, Britaninë e Madhe. 

Ministri Hoxhaj tha po ashtu se Britania e Madhe së bashku me Austro-Hungarinë kanë qenë dy shtetet vendimtare që kanë mundësuar krijimin e shtetit shqiptar në fillim të shekullit 20. 

“Britania e Madhe së bashku me Shtetet e Bashkuara të Amerikës janë dy fuqitë më vendimtare që kanë kontribuar edhe për lirinë e Kosovës, por edhe formimin e shtetit të Kosovës si shtet i pavarur dhe sovran”, tha Hoxhaj. 

Myrna McGreggor, nga Ambasada e Britanisë së Madhe në Prishtinë tha se, shteti i saj dhe shqiptarët kanë një histori të gjatë dhe tejet interesante. 

“Politika britanike drejt shqiptarëve ka qenë e fokusuar në sigurinë dhe stabilitetin në rajon”, tha McGreggor. 

Ambasadori i Republikës së Shqipërisë në Prishtinë, Islam Lauka, tha se hapja e kësaj ekspozite bëhet në një moment jubilar, në kuadër të 100-vjetorit të shpalljes së pavarësisë së Shqipërisë dhe të 5-vjetorit të shpalljes së pavarësisë së Kosovës. 

Në anën tjetër, Shkëlzen Maliqi, kurator i ekspozitës vlerësoi materialet e sjella nga Bejtullah Destani nga Qendra për Studime Shqiptare në Londër. 

“Është një koleksion shumë i çmueshëm. Për mbi 20 vjet ai ka mbledhur ndoshta dhjetë mijë e më shumë dokumente, fotografi, libra që kanë të bëjnë me çështjen shqiptare dhe Ballkanin”, tha Maliqi. 

Bejtullah Destani nga Qendra për Studime Shqiptare nga Londra tha se viteve të fundit është koncentruar të sjellë disa imazhe të cilat janë të natyrës historike, hartografike, arsimore dhe karikaturave të ndryshme të cilat pasqyrojnë historinë e Shqipërisë. 

Ai ka veçuar tre dokumente shumë interesante, dokumentin e aktit të besës, i nënshkruar nga shumë fise të veriut të Shqipërisë, i organizuar nga gjeneral Philips, dokumentin e shekullit 16 ku tregon që mbreti Henri VIII ka veshur kostum shqiptar dhe dokumentin e Komitetit të Korfuzit të vitit 1883, i organizuar nga Francesco Crispi, një arbresh në anën tjetër të Adriatikut. 

Ekspozita “Si i shihte Londra Ballkanin, Kosovën dhe Shqipërinë 100 vjet më parë?”, do të jetë e hapur deri më 1 mars 2013, në ambientet e Bibliotekës Kombëtare dhe Universitare të Kosovës në Prishtinë.