Ish-basketbollisit i njohur, Muhamed Thaçi ka vendosur të futet në politikë. Ai do të jetë kandidatë për kryetar të komunës së Çairit nga radhët e Partisë demokratike shqiptare (PDSH) në zgjedhjet lokale të muajit mars të vitit 2013. Kjo është vendosur në mbledhjen e mbajtur para pak ditësh në Çair, ku i pranishëm ka qenë edhe kryetari Menduh Thaçi.

“Po, është e vërtetë se kam hyrë në politikë. Kam përkrahjen e familjes sime, njerëzve të PDSH-së dhe të gjithë shoqërisë sime. Besojmë se do t’ia arrijmë qëllimit. Mendoj se Çairit i duhet një njeri i ri që mund të bëj ndryshime. Do të hartojmë programin dhe projektet për të nxjerrë komunën nga errësira në dritë. E gjithë kjo do të bëhet me punë dhe sinqeritet”, deklaroi Thaçi. 

Mirëpo, futja në politikë s’do të thotë se ai do të ndahet përgjithmonë nga basketbolli. “Jo, jo, basketbollin nuk e lë, sepse aty e kam kaluar jetën time. Por, do jem me pak aktiv”, shtoi Thaçi, i cili është trajner i grupmoshave të reja te klubi i basketbollit “NBA Çair”. 

Ndryshe, “Muja” gjatë karrierës së tij si basketbollist ka luajtur për shumë skuadra vendore, kosovare dhe evropiane.

Ai njoftoi se, të dielën në sallën Universale në Shkup do të bëhet promovimi i të gjithë kandidatëve të komunave të Shkupit.