“Tani për tani nuk mund të zbulojmë emrat e ekspertëve të cilët dëshirojmë t’i angazhojmë, por vetëm mund të themi se bëhet fjalë për ekspertë që kanë punuar në fushatën e fundit zgjedhore të presidentit amerikan Barak Obama”, deklaruan për “Lajm” burime partiake në BDI

Bashkimi Demokratik për Integrim (BDI) do të angazhojë ekspertë të huaj gjatë fushatës parazgjedhore, njoftojnë burime brenda kësaj partie. 

Ato thonë për “Lajm” se nënkryetari i partisë Izet Mexhiti dhe kandidati për kryetar në komunën e Kërçovës, Fatmir Dehari, gjatë qëndrimit të tyre njëjavor në SHBA, përveç takimeve me diasporën janë takuar edhe me disa ekspertë amerikanë të cilët kanë marrë pjesë edhe në fushatën e fundit zgjedhore të presidentit Barak Obama. 

Tani për tani nuk zbulohet nëse është arritur marrëveshje për angazhim të tyre, e as për 

“Dëshirojmë të zhvillojmë një fushatë moderne, ndryshe nga fushatat e deritanishme. Ky ka qenë shkaku pse kemi realizuar këto takime. Ende nuk kemi arritur marrëveshje konkrete, por besoj se edhe kjo do të ndodhë së shpejti. Tani për tani nuk mund të zbulojmë emrat e ekspertëve të cilët dëshirojmë t’i angazhojmë, por vetëm mund të themi se bëhet fjalë për ekspertë që kanë punuar në fushatën e fundit zgjedhore të presidentit amerikan Barak Obama”, deklaruan këto burime për “Lajm”. 

Përfaqësues të Partisë Demokratike Shqiptare (PDSH) kanë qenë të pakontaktueshëm për të dhënë informacione lidhur me mundësinë për angazhim të ekspertëve të huaj në fushatën e ardhshme zgjedhore. Prej më herët dihet se këshilltar i kryetarit të PDSH-së është Janush Bugajski, ekspert i njohur amerikan për çështje të Ballkanit. 

Ndërkaq nga Rilindja Demokratike Kombëtare (RDK) thonë se nuk kanë ndërmend të angazhojnë ekspertë të huaj. 

“RDK është parti e cila nuk ka qenë në pushtet, ne nuk kemi keqpërdorë mjetet e qytetarëve, andaj nuk kemi mundësi të angazhojmë ekspertë të huaj në fushatë. Megjithatë ne jemi të bindur se qytetarët do të dijnë të vlerësojnë se ajo që e ofron RDK-ja është opsioni më i mirë për shqiptarët”, thotë Zeqiri.