Osmani: Për partinë po punojmë në terren

Kryetari i Komunës së Gostivarit, Rufi Osmani ka pohuar për “Lajm” se po përgatitet të formojë parti të re politike në Maqedoni. “Objektivisht ne po përgatitemi në terren për të hapur një parti. Po punojmë me njerëz, konsultohemi me ata, por diçka konkrete ende nuk është vendosur”, tha Osmani. Kryetari aktual i Gostivarit u zgjodh me mbështetjen e shumicës së elektoratit në Gostivar. Ai si kandidat i pavarur bëri sensacionin më të madh në zgjedhjet e fundit komunale, duke mposhtur kryetarin e deriatëhershëm, Nevzat Bejta. Osmani, i cili i vetëm kishte grumbulluar rreth 20 mijë vota në zgjedhjet e fundit, duke pasur parasysh gjendjen e shqiptarëve në Maqedoni dhe kërkesat e shumta, ka filluar konsolidimin e radhëve për partinë e re të ardhshme të shqiptarëve në Maqedoni. “Nuk do të them se kjo parti do të dalë në skenë brenda një muaji ose më vonë, sepse jemi në fazën fillestare. Opinioni në Maqedoni do të njoftohet me kohë për gjithçka që ne do të bëjmë”, tha në fund Osmani. Ai nuk ka treguar se si do të quhet kjo parti, cili do të jetë pozicionimi i saj në politikë dhe cila do të jetë platforma e tyre kryesore.

Ndryshe, Rufi Osmani në opinionin më të gjerë në Maqedoni njihet si politikani i cili për herë të parë e vendosi flamurin kombëtar shqiptar në Komunën e Gostivarit, të cilën e udhëhiqte nga viti 1996. Pas 6 muajsh rezistence institucionale dhe demokratike në funksion të legalizimit të flamurit kombëtar shqiptarë, me rastin e ngjarjeve tragjike të 9 korrikut të vitit 1997 arrestohet dhe dënohet me 14 vite burg. Osmani në karrierën e tij ka qenë deputet në Parlamentin e Maqedonisë, profesor i ekonomisë në USHT dhe UEJL, kurse rikthimin në politikë e bëri në zgjedhjet e vitit 2008 kur erdhi sërish në kreun e Komunës së Gostivarit. /bekri ajdini/

Osmani vizitë zyrtare në Stamboll

Me ftesë të sekretarit të përgjithshëm të Lidhjes së komunave të botës turke, Ertugrul Gazi Saglam, kryetari i komunës së Gostivarit, Rufi Osmani mori pjesë në një takim të vetëqeverisjeve lokale. Osmani, realizoi takime edhe me kryetarët e katër komunave të Stambollit. Në takimin me kryetarin e komunës Pendik, Dr Salih Kenan Shahin, Rufi Osmani shkëmbeu përvoja për mënyrën e financimit të komunave, gjetjen e investitorëve në sektorin e ndërtimit dhe dhënien me koncesion të shërbimeve publike komunale në Turqi dhe Maqedoni.