Presidenti Topi zyrtarizon ndërmjetësimin

Dialogu mes dy forcave më të mëdha politike shqiptare, është një ndër pikat themelore të rezolutës së Asamblesë Parlamentare të Këshillit të Europës që u miratua në fund të janarit në Strasburg.

Njoftimi u bë në mesditë nëpërmjet një deklarate të botuar në faqen zyrtare të internetit të presidencës shqiptare.

Në të bëhet e ditur se zoti Topi mirëpriti gatishmërinë dhe vullnetin e shprehur për dialog të Kryeministrit të Shqipërisë, Sali Berisha dhe udhëheqësit të opozitës, Edi Rama.

Njoftimi nuk jep afate se kur pritet të zhvillohet tryeza e përbashkët, ndërsa njofton se zoti Topi do të vijojë në ditët në vazhdim kontaktet paraprake të punës me Kryeministrin e Shqipërisë, udhëheqësin e opozitës si dhe me bashkësinë ndërkombëtare, për të përgatitur sikurse cilësohen në njoftim, termat e bisedimeve që do të zhvillohen gjatë tryezës së përbashkët.

Në reagimin e parë pas këtij njoftimi, Arta Dade e PS-së tha se opozita nuk do të heqë dorë nga kërkesa e saj për hapjen e kutive, ndërsa e ftoi kreun e maxhorancës Berisha të pranojë transparencën e zgjedhjeve.

Ky i fundit, vazhdimisht ka deklaruar se është i gatshëm për dialog, por nuk ka pranuar hapjen e kutive.

Dialogu mes dy forcave më të mëdha politike në vend, PD në pushtet dhe PS në opozitë, është ndër pikat themelore të rezolutës së Këshillit të Europës që u miratua në fund të janarit në Asamblenë Parlamentare të KiE në Strasburg.

Një delegacion i këtij institucioni pritet të shkojë ditët e ardhshme në Shqipëri./bbc/