Ibraimi debutoi në Bundesligë

Në xhiron e 21-të të Kampionatit gjerman, në ndeshjen e Schalke 04 kundër ekipit të Freiburgut, e cila përfundoi me rezultat baras 0:0, lojtari shqiptar nga Maqedonia, Besart Ibraimi ka debutuar në minutën e 77-të, duke zëvendësuar lojtarin Chrostof Moritz. Gjatë kësaj periudhe, ai e ekzekutoi një gjuajtje nga këndi, por edhe kjo nuk ndikoi në rezultatin përfundimtar. Gazetat gjermane kanë shkruar se as Ibraimi nuk mundi të ndryshoj diçka në favor të skuadrës së tij dhe u deshën të kënaqen me një pikë. Në një deklaratë ekskluzive për "Lajm", Besarti ka pohuar: "Jam shumë i lumtur që mu dha rasti të debutoj për ekipin e Schalke 04. E falënderoj shumë trajnerin, i cili më ofroi këtë mundësi, duke dëshmuar besimin e tij tek unë. Për disa minuta lojë, nuk pata fat që të jem shpesh në kontakt me topin, me përjashtim të një gjuajtje nga këndi. Gjatë kësaj kisha emocione të mëdha, duke marrë parasysh se luaja në një nga kampionatet më të fortë në Evropë. Shpresoj se në të ardhmen do të kem mundësi të luaj më tepër që nga fillimi dhe do të dëshmoj kualitet e mia", ka deklaruar Ibraimi, i cili megjithatë ishte i kënaqur nga paraqitja e tij. Në javën e ardhshme, ekipi i Schalke do të luajë në terren vendës kundër ekipit të Kolnit, të dielën në kuadër të javës së 22-të. Përndryshe, ekipi i Schalke gjendet në vendin e tretë, vetëm tri më pak nga dy të parët (Bayeri dhe Bayerni) që kanë nga 45 pikë.