Turqia do të përforcojë sigurinë në kufi me Sirinë

Turqia

Kryeministri turk, Ahmet Davutoglu ka premtuar se do të rrisë sigurinë përgjatë kufirit të vendit të tij me Sirinë, pasi 30 persona u vranë nga shpërthimi i një bombe në qytetin Suruç.

Hetuesit deklarojnë se atentati dyshohet të jetë shkaktuar nga një grua kamikaze, e dërguar nga Shteti Islamik.

Korrespondentët e mediave ndërkombëtare thonë se Turqia po gjurmon militantët pas akuzave të mëparshme se i kishte injoruar ata.

Por shpërthimi shkaktoi një protestë të dhunshme në Stamboll, me policinë që përdori pompa me ujë, gaz lotësjellës dhe plumba gome për të shpërndarë manifestuesit.

Ngjarja e së hënës goditi një grup aktivistësh të rinj që kishin planifikuar të kalonin kufirin për në Siri dhe të ndihmonin në rindërtimin e qytetit të Kobanes.

Një video e publikuar tregon grupin që po mbante një konferencë për të diskutuar mbi planet, kur një shpërthim ndodh papritur mes anëtarëve të tij, shumica e të cilëve studentë, të mbledhur në një qendër kulture.

Kobane ndodhet fare pranë Suruçit, përtej kufirit dhe ka qenë skenë e luftimeve të ashpra mes ISIS dhe luftëtarëve kurdë.

Qyteti u rimor nën kontrollin e kurdëve në janar dhe Suruçi ka strehuar shumë refugjatë sirianë që u janë larguar luftimeve në Kobane.

/ Top Channel

Loading...