Prokurori Special i Zyrës së Prokurorisë Speciale të Kosovës, amerikani David Schwendiman, është i vetmi që është në dijeni për personat të cilët do të akuzohen për krime lufte nga Gjykata Speciale. Kështu të paktën ka konfirmuar për “Indeksonline”, avokati Tomë Gashi.
Sipas tij, emrat e disa funksionarëve të lartë që janë përfolur këtyre ditëve në media nuk mund të thuhet se janë të vërtetë.

“Gazetaria hulumtuese duhet ta thotë të vërtetën për hulumtimet që i bën. Unë nuk mund ta them se a janë të vërtetë ata emra që janë përmendur në një medium apo portal ditën e djeshme apo jo, por e di që i vetmi person që 100% e di se kush do të jenë të akuzuarit e parë është kryeprokurori i Zyrës së Prokurorisë në Hagë, zotëri David Schwendiman dhe askush tjetër”, ka thënë ai.

Megjithatë, Gashi theksoi se është e rëndë nëse përmenden emra të caktuar dhe pastaj eventualisht del që ata nuk janë të akuzuar.

“Por duhet që këto akuza të bëhen publike dhe pastaj gjithçka të dihet. Unë s’mundem ta konfirmoj apo mohoj se një çështje e tillë mund të jetë e vërtetë”, është shprehur ai.

Në fund, Gashi është pyetur edhe për numrin e viteve që eventualisht do të mbajnë të burgosurit kosovarë. “Do të ketë me burgim përjetshëm. Varet prej çfarë vepre por maksimalja është kjo”, është shprehur ai.

Loading...