Kosovarja Gona Dragusha përcjellësja e dytë e Miss Univers

Bukuroshja nga Kosova, Gona Dragusha, ka përfaqësuar denjësisht vendin tonë në garën e bukurisë Miss Univers, të zhvilluar në Bahame, duke qenë konkurrentja e dytë më e fortë për fituesen, Miss Venezuelën, në garën për më të bukurën e universit.

Miss Venezuela, Stefania Fernandez, ka dalë fituese për titullin e më të bukurës në edicion të 58-të të Miss Univers, që u mbajt të dielën mbrëma në Atlantis, Paradise Island në Bahame.

Vitin e kaluar fituese ishte bukuroshja tjetër nga Venezuela, Dayana Mendoza dhe kjo është hera e parë në historinë që një vend fiton dy herë radhazi këtë garë. Numri i bukurosheve nga ky vend që kanë fituar këtë garë, tash arrin numrin gjashtë.

Fernandez është zgjedhur në mesin e 83 garueseve, ndërsa përcjellësja e parë e saj ka dalë Miss Republika Dominikane, Ada Aimee de la Cruz, dhe e dyta, bukuroshja nga Kosova, Gona Dragusha. Në mesin e pesë më të mirave kanë qenë edhe Miss Australia dhe Miss Puerto Rico.

Kjo garë organizohet nga miliarderi amerikan Donald Trump./Telegrafi/