Shteti italian ka paraqitur llogarinë familjes së bosit mafioz, Totò Riina. Të afërmve të familjes corleoneze të organizatës “Cosa nostra”, i cili vdiq më 17 nëntor 2017, i ka mbërritur një njoftim nga Riscossione Sicilia për mbledhjen e taksave prej rreth 2 milionë eurosh për shpenzimet e bëra për mbajtjen e shefit të mafies në burg.

Riina, i cili u arrestua më 15 janar 1993 pas 23 vitesh në arrati, kaloi në qeli, 24 vjet. Për të aktivizuar procedurën e rimarrjes së kredisë do të ishte, përmes Ministrisë së Drejtësisë, nga burgu i Parmës, institucioni i fundit penitenciar në të cilin u mbajt bosi i mafies.

“Për ne kjo duket një absurditet, sepse ligji shprehimisht përjashton që rimbursimi për shpenzimet e mbajtjes në burg të shtrihet tek trashëgimtarët e të dënuarit, kështu që po e studiojmë mirë çështjen për të parë se cilat janë kushtet”, shpjegon avokati i Riinës, Luca Cianferoni.

Riina, njëri prej “kumbarëve” më të tmerrshëm të historisë së mafias siçiliane, kishte kohë që luftonte me kancerin. I burgosur në 1993-shin, njeriu që i shpalli luftë shtetit po kryente 26 dënime me burgim të përjetshëm për dhjetëra vrasje, e ndëshkimin për ta kaluar të gjithë jetën prapa hekurave e ka marrë dhe djali i madh i tij, Giovanni.

Në vitin e prangosjes së kryemafiozit, një seri shpërthimesh me bomba të faturuara atij lanë 10 të vdekur në Romë, Milano e Firence. Një vit më parë, beteja e tij me forcat e rendit i kishte kushtuar jetën dy gjykatësve të lartë të Antimafias, Giovanni Falcone dhe Paolo Borsellino.

I plakur e i drobitur tashmë, bosi frikësues që urdhëroi më shumë se 150 ekzekutime, kërkoi në korrik lirimin nga burgu me arsyetimin e sëmundjes, por hija e tij ishte tepër e rëndë edhe pas kaq kohësh izolimi.

Gjykata vendosi ta linte në qeli, me arsyetimin se kujdesi shëndetësor që i rezervohej atje ishte po aq i mirë sa ai që do të merrte jashtë.

“Për mua ti nuk je Toto Riina, je thjesht babai im dhe të uroj gëzuar ditëlindjen në këtë ditë të trishtë, por të rëndësishme. Të dua fort”, shkroi të enjten në Facebook, djali i tij Salvatore.

Riina nuk shfaqi në asnjë moment ndonjë shenjë pendimi. Jo më larg se përpara 3 vitesh, ndërsa fliste në burg me një të dënuar tjetër, ai mburrej për vrasjen e Falcones e vazhdonte t’i kërcënonte magjistratët me vdekje. Por për kapitenin që e arrestoi përpara dy dekadash e gjysmë, kolonelin Sergio de Caprio, Riina ishte vetëm një burracak e asgjë më shumë.

Loading...